Chegou setembro e dámosvos a benvida ao novo curso 2020-2021! Como sabedes este curso vai ser excepcional por mor da pandemia do Covid-19 e imos atopar un centro moi cambiado para adaptarnos á nova situación.
Os cambios tamén afectan á nosa biblioteca, xa que este curso funcionará como aula, polo que non poderemos usala como o noso punto de encontro lector. Estamos intentando arranxar un recunchiño de lectura noutro espazo e xa vos iremos informando dos progresos con este tema. Moitas grazas pola paciencia!
Pero non todo van ser malas novas! Seguiremos dispoñendo do servizo de empréstito para que poidades seguir accedendo ás vosas lecturas preferidas! Este servizo ofrecerase nun pequeno espazo da biblioteca que non está dedicado a aula.
Os empréstitos realizaranse nos recreos do seguinte xeito: nos primeiros recreos realizaredes a petición de libros e nos segundos recreos levaredes a cabo a recollida dos libros pedidos.
Como non pode haber aglomeracións, preparamos unhas quendas de petición e recollida. Os luns acudiredes os alumnos e alumnas de 1º de ESO e mais os profesores e profesoras, os martes farédelo o alumnado de 2º de ESO, o mércores viredes os alumnos e alumnas de 3º de ESO, o xoves 4º de ESO e 2º de bacharelato, e os venres 1º de bacharelato e FP.
O servizo de empréstito estará dispoñible desde o vindeiro luns, 28 de setembro para todos os cursos e niveis, agás para 1º de ESO que teredes que agardar un pouquiño máis mentres facemos os vosos carnés lectores. Agardamos non demorarnos moito e levárvolos canto antes ás vosas aulas.
Tamén seguirá funcionando a nosa biblioteca virtual a través do blog da biblioteca, ao que podedes acceder directamente marcando o enderezo https://bibliocarlosnieto.blogspot.com ou desde o menú superior ou a columna lateral da páxina principal do sitio web do noso centro.
No blog da biblioteca podedes consultar información sobre actividades da biblioteca e novidades culturais, acceder a outros sitios web de interese e mesmo facer buscas no catálogo da biblioteca dos libros nos que esteades interesados. Para facer esas buscas só tedes que premer na imaxe do buscador Meiga situado na columna da dereita do blog. Unha vez que atopedes o voso libro podedes copiar a referencia e facernos chegar a vosa petición de empréstito nun primeiro recreo do día da semana adxudicado ao voso curso ou a través do correo electrónico bibliotecaiesames@gmail.com.
A vosa opinión impórtanos moito, así que non dubidedes en facernos chegar calquera comentario ou suxestión por correo electrónico ou verbalmente.
Desde a biblioteca dámosvos a benvida e desexámosvos un feliz curso 2020-2021 con moita saúde e moitas lecturas!
Ningún comentario:
Publicar un comentario