XV Edición do Día da Ciencia en Galego

Durante o mes de novembro de 2024 celébrase a XV Edición do Día da Ciencia en Galego que ten por obxectivo divulgar a ciencia realizada en lingua galega.

Todos os anos o Día da Ciencia en Galego ten un lema, así como un homenaxe a un científico ou científica do ámbito mundial e un científico ou unha científica de ámbito galego.

A edición deste ano está adicado á astronomía, e o lema é Descubre o teu universo.

Dentro deste campo de investigación o científico internacional é Galileo Galilei, mentres que a homenaxe dentro da comunidade científica galega recae en Enrique Vidal Abascal, quen, aínda que nado en Oviedo, desenvolveu a súa carreira científica en Galicia.

A Consellería de Cultura, Lingua e Xuventude, en colaboración coa Conselleria de Educación, Ciencia, Formación Profesional e Universidades, dá pulo á celebración anual do mes de novembro como o Mes da Ciencia en Galego nas Bibliotecas. Este ano elixiu unha imaxe, que podedes ver a eguir, e un texto a modo de manifesto. O texto é de Felipe Criado-Boado, arqueólogo e director do Instituto de Ciencias do Patrimonio do CSIC, quen foi Premio nacional de investigación en Humanidades Ramón Menéndez Pidal, no ano 2023. Podedes ler o manifesto e consultar máis información e actividades en Bibliotecas Escolares.

Coma sempre, podedes visitar a exposición sobre bibliografía e filmografía relacionada coa ciencia en galego e reservar aquela lectura, documental ou película que máis che interese. Tamén podedes consultar diferentes recursos dixitais.

O día 11 de novembro, o alumnado do Club de Ciencia realizará unha observación do ceo nocturno con telescopio desde o eido do noso instituto, dirixida e explicada polo Observatorio Astronómico Ramón María Aller da Universidade de Santiago de Compostela.

O 14 de novembro, o alumnado do Club de Ciencia asisitirá á charla telemática Observando o universo, da astrofísica Begoña Vila Costas, astrofísica da NASA, no Congreso Enciga.

Podedes ver vídeos de Cienciaclip e de Xeoclip e escoitar episodios do programa Efervesciencia.

Día Internacional para a eliminación da violencia contra a muller

Un ano máis, desde a biblioteca queremos divulgar o Día Internacional para a eliminación da violencia contra a muller e  poñer de manifesto o noso compromiso coa igualdade de xénero e o rexeitamento máis absoluto de todas as formas de violencia contra a muller. 

O Equipo de Dinamización Lingüística e a o Equipo da Biblioteca prepararon unha exposición para concienciar á comunidade educativa da importancia de identificar diferentes manifestacións de amor tóxico, e de recoñecer tamén as características dunha relación positiva.

No Espazo Maruxa Mallo en fronte da biblioteca, podedes visitar a exposición, consultar diferentes recursos dispoñibles na biblioteca sobre este tema, e tamén deixar os vosos propios pensamentos sobre como debe ser unha relación positiva para todas as partes implicadas.

Tamén podedes consultar e traballar nas vosas aulas diferentes propostas didácticas disponibilizadas por diferentes organismos.

Deixámosvos algúns vídeos que tratan o tema da discriminación da muller e a violencia contra ela.

PremendoTVE publica "Mil mujeres asesinadas", un especial interactivo que homenaxea e relata as vidas de mulleres asasinadas pola violencia de xénero. Este proxecto foi homenaxeado co Prix Europa. Podedes ver un teaser do proxecto neste enlace. neste enlace.

Moito se está a reflexionar sobre a educación e a presión social tradicional nos homes que deriva en comportamentos machistas e como esa educación e actitude social se está a cuestionar. Isto recóllese no documental Clonar a un hombre, dirixido por Iván Roiz, e Serás un hombre, de Isabel de Ocampo, gañadora dun premio Goya ao mellor documental.

A seguir podedes ver o documental Clonar a un hombre completo, e un tráiler do documental Serás un hombre.

Tamén podedes ver o vídeo 48 cosas que los hombres escuchan a lo largo de su vida e 48 cosas que las mujeres escuchan a lo largo de su vida.

Que significa facer algo como unha nena? Por que se utiliza esa expresión como algo despectivo ou ridiculizante? Usas ti esa expresión ou ouvíchela usar a alguén algún vez? 

Hai anos foi iniciado un blog de micromachismos cotiás por Eldiario.es. Na actualidade o concepto de micromachismo é coñecido por todos e todas. Podedes ver uns vídeos sobre micromachismos e consultar exemplos de micromachismos aquí e aqui.

A seguir tedes tres vídeos de diferentes campañas para concienciar sobre a necesidade de erradicar os comportamentos machistas na sociedade: Vilencia dixital, Cambia el trato e Los celos no son excusa.

O concello de Güéjar Sierra (Granada) lanzou unha campaña contra o acaso á muller co título Si fuera al revés, también te asustarías. Aquí podedes ver o vídeo:

Que che parece este vídeo sobre sexismo nas producións de Disney?

A continuación deixámosvos varias charlas e curtas sobre as desigualdades de xénero e a violencia contra a muller: ¿Por qué es importante hablar de feminismo?, Xogo de nenos, Corazón amoratado, Un día normal, Convidados de pedra.

A seguir podes ver o vídeo da canción La otra mitad, de Pilu Verver. Propoñémosche o reto de recoñecer o maior número posible das mulleres que saen no vídeo.

E para rematar algunhas cancións: Ni una más, de Aitana; Concordias de papel, de Sés; Mi hombre, de Nacha Guevara; Salir corriendo, de Amaral; Malo, de Bebé; Hogar, de Pedro Guerra; La puerta violeta, de Rozalén.

 

Samaín 2024

O 31 de outubro celébrase a festa tradicional do Samaín, e este ano O equipo de Dinamización Lingüística, o Equipo de Biblioteca e as alumnas da materias de Xeografía, Historia, Arte e Patrimonio de Galicia, quixemos facer unha actividade que dera a coñecer as características do Samaín e as súas diferenzas co Halloween.

Para iso o alumnado realizou unha investigación sobre as características do Samaín e as súas diferenzas co Halloween e a partir de aí elaborou unha exposición dividida en diferentes seccións:

Sección Samaín en obxectos e na biblioteca, de bibliografía e recursos audiovisuais, así como de obxectos relacionados co Samaín, acompañados de cartelas explicativas.

Sección Os seres queridos que xa non están, de homenaxe aos defuntos de cada familia, retomando a tradición de colocar un prato e cubertos na mesa a noite do 31 de outubro.

Sección Canto sabes sobre o Samaín? para a participación activa das persoas asistentes á exposición, na que se propoñían diferentes afirmación sobre as que as persoas visitantes tiñan que decidir se eran verdadeiras ou falsas despois de documentarse percorrendo a exposición.

Sección A biodiversidade ameazada pola superstición, na que se analizaban diferentes mitos relacionados con animais que chegan a poñelos en perigo, e na que os propios animais desmontaban esos mitos baseándose na ciencia.

O grupo tamén decorou o interior da biblioteca e preparou marcapáxinas artesanais con temática do Samaín para repartir ás persoas que collesen libros en préstimo o día 30 de outubro.

Ademais da exposición, as alumnas de Patrimonio de Galicia realizaron a actividade Truco ou trato, na que visitaron os diferentes grupos de 1º e 2º ESO e fixeron unha representación teatralizada do Samaín e unha actividade de preguntas sobre o Samaín. No recreo, realizaron a actividade co alumnado que se atopaba na biblioteca.

A seguir podedes ver diferentes fotografías do proceso de traballo. Moitos parabéns, rapazas!

Semana Mundial da Alfabetización Mediática e Informacional

A UNESCO creou a celebración da Semana Mundial da Alfabetización Mediática e Informacional (AMI) para concienciar á poboación da importancia da lectura crítica da información. Esta semana esténdese do 24 de outubro ao 31 de novembro.

O lema da celebración deste ano é As novas fronteiras dixitais da información: Alfabetización mediática e informacional para a información de interese público. 

A Semana Mundial da Alfabetización Mediática e Informacional 2024 subliñará a importancia de seguir o ritmo da rápida evolución do panorama dixital e de dotar aos usuarios das habilidades necesarias para identificar, avaliar e comprometerse coa información de interese público en liña. 

Unha axenda global colectiva da que forman parte as bibliotecas escolares que deben , máis que nunca,  reforzar o traballo cos medios de comunicación e identificación das noticias falsas e as competencias ALFIN e AMI. Un compromiso de todo o sistema bibliotecario para non deixar a ninguén atrás grantizando o acceso á información, a cultura e o coñecemneto.

Bibliotecas Escolares

Para celebrar esta semana, a Biblioteca levou a cabo dous obradoiros con alumnado de 2º de bacharealto, un de lectura crítica de novas de xornal e outro de identificación de falacias argumentais.

Día das bibliotecas

O Día das Bibliotecas celébrase o 24 de outubro desde 1997. Trátase dunha conmemoración impulsada pola Asociación de Amigos del Libro Infantil y Juvenil á que se foron sumando, xa dende hai algún tempo, o propio Ministerio de Cultura e todas as administracións autonómicas.

 No caso galego, a Dirección Xeral do Libro, o Cómic e a  Lectura, da Subdirección Xeral  de Coordinación Bibliotecaria é o organismo que impulsa esta edición da celebración do Día das Bibliotecas.

O lema deste ano, "Por un futuro sostible", pretende destacar o papel fundamental que desempeñan todas as tipoloxías de bibliotecas (públicas, escolares, universitarias, especializadas e nacionais/rexionais) na consecución dos Obxectivos de Desenvolvemento Sostible da Axenda 2030.

A través das súas coleccións, servizos e actividades con usuarios, as bibliotecas contribúen a construír unha sociedade cada vez mellor informada, máis igualitaria, solidaria e xusta, plenamente consciente da necesidade de levar un modo de vida sostible como compromiso coas xeracións futuras.

 Información tomada de Bibliotecas Escolares.

No noso instituto, celebramos o día recabando información sobre a opinión que ten o alumnado sobre a biblioteca e recollendo suxestións para a súa mellora, xa que estamos nun proceso de transforamción da biblioteca no que queremos implicar a toda a comunidade educativa.

IX Edición do Día das escritoras

 O Día das Escritoras é unha iniciativa  organizada entre a Biblioteca Nacional de España, a Federación Española de Mujeres Directivas e Executivas Profesionais e Empresarias (FEDEPE) e a Asociación Clásicas e Modernas, asociación para a igualdade de mulleres e homes na Cultura. Ademais, contará coa colaboración de Asociación Colexial de Escritores (ACE) e o Centro Español de Dereitos Reprográficos (CEDRO). Desde 2016 búscase reivindicar o labor e o legado das escritoras a través da historia.

A data de celebración do Día das escritoras é o luns máis cercano á festividade de Teresa de Jesús, o 15 de outubro. Por esta razón, este ano 2024  a data de celebración é o 14 de outubro.

O lema do Día das escritoras deste ano é A periferia da periferia: Mulleres que miraron ao mundo rural.

 

"Por iso o próximo 14 de outubro acordarémonos de marabillosas escritoras, poetas e pensadoras como Concha Espiña, Santa Teresa, Dolores Medio, Mariluz Escribano, Margarita Nelken, Rosalía de Castro, María Zambrano, Gabriela Mistral ou Ernestina de Champourcin. Pero tamén das que non puideron selo. Pois elas e non outras son as que mantiveron e manteñen vivo ese mundo rural e a súa cultura, ese campo, esa periferia á que, en xeral, miramos pouco e mal".

Ana Iris Simón, comisaria da IX Edición do Día das Escritoras 2024

 

Podedes consultar unha colección de textos en galego de escritoras que miraron ao mundo rural seleccionados por Xosé María Lores, Paz Pereiro e Pilar Sampedro, e unha colección de textos en castelán seleccionados por Ana Iris Simón.

Día das linguas

O 26 de setembro celébrase o Día europeo das linguas. No noso instituto cada vez hai máis diversidade na procedencia de alumnado e profesorado, e son faladas cada vez máis linguas, tanto europeas como doutros continentes.

No instituto existen as materias de lingua galega, castelán, francés, inglés, italiano e portugués; mais o noso alumnado fala moitas máis linguas: catalán, euskaro, armenio, árabe, ucraíno, ruso, entre outras.

No espazo Maruxa Mallo podedes ver unha mostra bibliográfica en diferentes idiomas. Tamén vos invitamos a que escribades "Feliz día das linguas!" (ou outra mensaxe que queirades deixar)  nos vosos idiomas ou en idiomas que coñezades. Para iso podedes usar as tarxetiñas que atoparedes na mesa á entrada da biblioteca e os soportes para a colocación das tarxetiñas escritas.

Feliz día das linguas! 

Origen del Día Internacional de la Lengua Materna (antena3.com)

Espazo de xogos de mesa da biblioteca

Xa está aberto o Espazo de xogos de mesa da biblioteca!! Este espazo sitúase no soto do instituto ao lado do salón de actos.

O espazo de xogos de mesa pode ser utilizado nos recreos polos alumnos e alumnas do Club de xogos e así como por outros alumnos e alumnas que desexen facelo.

As persoas mediadoras do espazo de xogos de mesa son profesores e profesoras e os voluntarios do espazo de xogos, Antón Oliveira e Mateo Pérez.  Por favor, seguide as súas indicacións para asegurar o bo funcionamento do espazo. Respectade as persoas que alí se atopan, tanto como mediadoras como xogando, así como os xogos dispoñibles e os horarios. 

Uns minutos antes de que toque o timbre de fin de recreo, por favor, retornade ordenamente os xogos aos armarios e arrombade as cadeiras que teñades usado. Asegurádevos de que non deixades ningunha peza dos xogos fóra nin lixo.

O espazo de xogos de mesa tamén pode ser usado en horario lectivo, nas titorías ou como actividade didáctica de calquera materia. Nos períodos lectivos o alumnado só pode estar no espazo de xogos acompañado polo profesorado ou persoas do Equipo de Orientación.

Se botades en falta algún xogo que vos guste, non dubidedes en avisarnos na biblioteca para que valoremos a súa compra.

Benvida ás novas e novos lectores!

Entre o día 13 e 23 de outubro os alumnos e alumnas de nova incorporación ao centro están visitando a biblioteca e os diferentes espazos relacionados con elas para coñecer a súa colección, así como familiarizarse co uso da biblioteca e dos espazos asociados e as diferentes actividades disponibles.

Ao longo destes días visitarán a biblioteca os alumnos e alumnas de 1º de ESO, 1º de FP Básica de Agroxardinería e complementos florais, 1º FP Básica de Informática , e 1º de Ciclo medio de Informática.

O alumnado tamén foi informado dos clubs de lectura existentes e do programa de voluntariado da biblioteca e algunhas persoas xa se ofreceron para participar no bibliovoluntariado.

Desde a biblioteca dámosvos a benvida e esperamos vervos ao longo do curso!

Feliz curso 2024-2025!

Comezamos un novo ano académico con moita ilusión!

Desde a biblioteca dámosvos a benvida e desexámosvos que teñades un feliz curso con moitas e fascinantes lecturas!

Coma sempre, agardámosvos na biblioteca, onde podedes ler as vosas lecturas favoritas, investigar, facer traballos en grupo, asistir a charlas e obradoiros, e moitas outras actividades! Lembrade tamén que temos o espazo de xogos, no soto, cunha morea de xogos de mesa ao voso dispor.

De aquí a nada, teremos as visitas guiadas para o alumnado novo do centro: o alumnado de 1º ESO, 1º FP Básica e 1º Ciclo dual.

Tamén abriremos as convocatorias para participardes como voluntariado da biblioteca, tanto para o alumnado como para o resto da comunidade educativa, e faremos a oferta de clubes de lectura variados, onde con certeza atoparedes algún que vos guste.

Lembrade tamén que temos unha caixa de suxestións á porta da biblioteca onde podedes deixarnos propostas para compra de libros, suxestións de actividades, ou ideas de calquera tipo que se vos ocorran para mellorar o funcionamento da vosa biblioteca.

O lema das Bibliotecas Escolares de Galicia para este curso é A biblioteca escolar, a escena! Con este lema quere dárselle pulo ao teatro en todas as súas variantes. 

Agardamos vervos axiña! Feliz curso 2024-2025!