Día Europeo das Linguas

O 26 de setembro celébrase o Día Europeo das Linguas (DEL). Esta data foi creada Consello de Europa en 2001, como unha iniciativa para poñer en valor o multilingüismo do Consello de Europa, que representa a 800 millóns de cidadáns de 47 países.

Na súa celebración participan numerosas institucións e asociacións con intereses culturais e lingüísticos, así como universidades e centros escolares. 

A celebración do Día europeo das linguas ten os seguintes obxectivos: (1) Preservar e potenciar a riqueza da diversidade lingüística e cultural de Europa. (2) Promover a aprendizaxe permanente de linguas tanto no ámbito escolar como fóra del para capacitar profesionalmente coma tamén para a súa aprendizaxe para o lecer. (3) Destacar a importancia da aprendizaxe de linguas e diversificar a variedade de linguas que se aprenden co obxecto de incrementar o plurilingüismo e a comunicación intercultural. (4) Coa ocasión deste día, organízanse unha gran variedade de evento.

No no noso centro existen as materias de lingua galega, castelán, francés, inglés, italiano e portugués; mais o noso alumnado fala moitas máis linguas: catalán, euskaro, armenio, árabe, ucraíno, ruso, entre outras.

Nos días a seguir realizaremos diferentes actividades realacionadas coas linguas organizadas polos departamentos que imparten linguas e a Biblioteca. Ao longo desta semana o alumnado de 1º de ESO realizará carteis con mensaxes escritas nas distintas linguas que coñezan.

No espazo Maruxa Mallo poderedes ver unha mostra das novidades bibliográficas en diferentes idiomas e deixar a mensaxe "Feliz día europeo das linguas!" (ou outra mensaxe que queirades deixar)  nos vosos idiomas ou en idiomas que coñezades. Para iso podedes usar as tarxetiñas que atoparedes na mesa á entrada da biblioteca e os soportes para a colocación das tarxetiñas escritas.

Feliz día das linguas! 

Despedindo o verán

O xardín creado polo alumnado de FP Básica de Agroxardinería e composicións florais o curso pasado xa floreu, e con algunhas das súas plantas o alumnado de 2º FP Básica de Agroxardinería realizou unha coroa floral para a biblioteca.

A grilanda foi feita sobre base de palla, con hortensias e flores secas e está situada á entrada da biblioteca para que poidades desfrutar dela.

Moitas grazas por este agasallo tan fermoso!

Xa o di o refrán!

O curso pasado (2024-2025), comezamos unha actividade titulada Xa o di o refrán! no que as alumnas da materia de Xeografía, Historia, Arte e Patrimonio de Galicia realizou unha recollida de refráns relacionados coas distintas estacións do ano usados polas súas familias, ao abeiro do Proxecto Terra e do programa Ponte...nas Ondas!

Cos refráns recollidos, as alumnas realizaron unha exposición por estacións do ano no xardín Norte do eido do centro. Ao rematar o curso antes do comezo do verán, decidiron deixar a exposición dos refráns desta estación para comezos do curso actual 2025-2026.

E como o prometido é débeda, o alumnado deste curso, realizou a súa propia recollida de refráns, que uniron aos recollidos o curso pasado, e expuxeron o conxunto no eido do centro. Deste xeito, foi pechado o ciclo anual e foi establecido un vínculo entre as alumnas do curso pasado e os alumnos e alumnas deste curso a través do traballo cooperativo realizado.

Invitámosvos a visitar a exposición e a engadir os refráns que coñezades e que non estean incluídos no conxunto.

Patio con(vida) VII

Comezamos un novo ano do proxecto Patio con(vida) para mellorar o desenvolvemento ecosocial do eido do centro. Este proxecto enmárcase no Proxecto Terra do Plan Proxecta.

Na nosa primeira saída de exploración polo eido atopamos varias sorpresas. Os días de chuvia de comezo de curso posibilitaron a aparición de diferentes especies de fungos, un deles este fungo típico de zonas de fraga e de finais de verán e comezos de outono. Sabedes como se chama esta especie?

Outro elemento destacado é a cantidade de landras que teñen os carballos (Quercus robur). Sabiades que non todos os anos teñen a mesma cantidade delas? Este é un ano de landras, é dicir, un ano en que os carballos dan máis landras do habitual. Os científicos barallan diferentes hipóteses sobre o motivo de que se produzan estes anos de maior produción. Unha delas é que se deba a condicións meteorolóxicas, asociándoos a temperaturas altas e seca. Sexa como for, o refraneiro galego xa fai referencia a estas situacións como se ve no refrán: Ano de landas, ano de graxas.

E xa comezaron os traballos para retirar a lona do xardín norte. Mirade que ben está quedando!

Feliz curso 2025-2026!

Comezamos un novo curso e unha nova aventura na nosa biblioteca. Dámosvos a benvida e desexámosvos que teñades un curso moi feliz e proveitoso.

Quen xa coñece a biblioteca, verá algúns cambios que foron feitos durante o verán, e que se suman aos feitos o curso pasado.

Quen chega este curso por primeira vez ao noso centro terá unha xornada informativa ao longo desta semana. 

Xa temos os horarios para o alumnado dos primeiros cursos:

1º ESO A: 10 de setembro, de 11:40 a 12:30

1º ESO B: 11 de setembro, de 11:40 a 12:30

1º ESO C: 9 de setembro, de 11:40 a 12:30

1º ESO D: 10 de setembro, de 9:40 a 10:30

1º ESO E: 11 de setembro, de 12:50 a 13:40

1º ESO FPB Agroxardinería e Imaxe persoal: 12 de setembro, de 10:50 a 11:40

1º Ciclo medio Informática: 12 de setembro, de 12:50 a 13:40

Esperamos vervos na biblioteca!

Durante as xornadas de presentación da biblioteca e de formación de novas persoas usuarias vivimos momentos moi bonitos, como o concerto de guitarra improvisado que Hugo, de 1º de Ciclo Medio de Informática ofreceu aos seus compañeiros e compañeiras. Moitas grazas, Hugo.

Feliz verán 2024-2025!

Un novo curso que se nos vai. Desde a biblioteca dámos os parabéns a toda a comunidade educativa por este ano académico e desexamosvos un feliz descanso e un bonito verán. Esperamos atoparvos de novo na biblioteca no curso vindeiro.

E, como todos os anos, deixámosvos unhas recomendacións de lectura para os diferentes niveis educativos e idades, propostas entre todos os centros do municipio de Ames. Podedes atopar exemplares das obras recomendadas para a ESO, Bacharelato, FP e ciclos na nosa biblioteca. Esperamos que vos gusten.

Feliz verán e felices lecturas de verán!

Foliada Ponte...nas ondas!

O día  23 o IESP de Ames participou na Foliada Agora cantamos nós, organizada pola Asociación Ponte...nas ondas!

Esta foliada reuniu a quince centros educativos de infantil, primaria, secundaria e ciclos de Galicia e Portugal, tivo lugar no Parque Eugenio Granell de Santiago de Compostela e nela sucedéronse actuacións dos centros educativos, de persoas portadoras, como Teresa dos Cucos, e de grupos de música, como De Vacas.

Todas as persoas asistentes desfrutaron e celebraron o patrimonio cultural galego e estreitaron lazos de unión e convivencia nun ambiente festivo e emotivo. Agradecemos á Asociación Ponte...nas ondas! a organización desta preciosa foliada e o coidado e atención que teñen sempre para o traballo que se desenvolve desde os centros educativos en relación ao patrimonio e a comunidade educativa que está detrás dese traballo.

O noso instituto quedou representado polo grupo As tres cordas, de 4º ESO C (formado por Elisa Méndez, Héctor Méndez, Lucía González, Pablo Martín, Víctor Álvarez e Zoe Glasscock) que nos agasallaron con tres pezas: O Pico, de Riobó; Muiñeira do Verdellinho, de Os d'Abaixo, e Se chove, de Treixadura. Dámoslles os parabéns pola súa formidable actuación e tamén enviamos os nosos parabéns a todos os outros centros participantes. Fixérono todos de marabilla e fixeron unha festa inesquecible!

Aquí podedes ver o vídeo resumo desta xuntanza. Esperamos volver repetir o próximo ano!

Cantacontos

O día 13 de xuño tivo lugar unha actividade de lectura compartida na que o alumnado de 3 anos de infantil do CEIP A Maía visitou a nosa biblioteca e asistiu a unha sesión de contos cantados por alumnos e alumnas de 4º de ESO, do Grupo de música do Club de lectura Bibliolocus. A actividade tamén incluíu a entrega dunhas bonitas plantas preparadas polos alumnos e alumnas de 1º FP Básica de Agroxardinería e composicións florais.

Os pequenos e pequenas escoitaron con atención os contos cantados, bailaron ao ritmo das súas cancións favoritas e tamén se animaron a saír ao palco e amosarlles aos nenos máis grandes o ben que cantaban.

Elisa, Lucía e Zoe cantaron a cantiga Se chove, de Treixadura, e o conto Matarile, acompañados á guitarra por Pablo.

Elisa e Lucía cantan o conto Se che pica un mosquito, acompañadas por Héctor ao violín, Pablo á guitarra e Zoe ao piano.

O grupo interpreta a canción Corre cabaciña, unha das preferidas dos pequechos que acompañan cantando e batendo palmas. 

Mais, xa abonda de tanto estar sentados!! Chegou o momento de bailar!

A seguir, Adrián e Saray, alumnos de Agroxardinería, fixeron entrega das plantas. Houbo para grandes e pequenos!

Como a estas alturas da festa xa eramos unha familia, os pequechos tamén se arrincaron a cantar. E que ben o fixeron!! O tempo pasou voando! Cunha derradeira canción, O Pico, de Riobó, interpretada por Elisa ao violín e Pablo á guitarra, demos por rematada a xolda e despedímonos ata o próximo curso!

Moitas grazas ao alumnado participante do IESP de Ames polo seu traballo e moitas grazas ao alumnado do CEIP A Maía por compartir este tempo connosco e encher o instituto de alegría. 

Seguiremos con máis actividades conxuntas no próximo curso!

Cóntoche un traxe

O día 6 de xuño o alumnado de 4º ESO desfrutou da actividade Cóntoche un traxe, desenvolvida por Montse Rivera, integrante do grupo de cantareiras Leilía. Esta actividade foi organizada polo Equipo de Dinamización Lingüística.

Carlos Negro actuou como mestre de cerimonias e presentou a Montse Rivera, resumindo a súa traxectoria e a súa contribución á cultura galega.

Montse falou sobre a diversidade de traxes tradicionais galegos situándoos no seu contexto histórico e social, e foi alternando as explicacións con cantigas relacionadas coa roupa e as actividades desenvolvidas á volta dela.

Para amosar os diferentes traxes, Montse pediu a colaboración de alumnos e profesores que actuaron como modelos.

Elisa e Dylan actuaron en representación do alumnado, cos nomes de Maruxa e Antón; Mónica e Carlos fixeron o propio en representación do profesorado, baixo os alcumes de Carmela e Xian. A parella representante do alumnado foi vestida con traxes de gala, mentres que a parella de docentes foi vestida con roupa de traballo.

Nestas fotografías podedes ver o guapas e guapos que estaban:

Ao final do obradoiro, en sinal de agradecemento, entregámoslle a Montse unhas fermosas plantas preparadas polo alumnado de Agroxardinería e arranxos florais, así como unha bolsa e postais conmemorativas das cantareiras.

Ademais, Montse Rivera e Leilía foron elixidas para inaugurar o que agardamos que se convirta nunha tradición do centro, consistente en homenaxear a unha persoa ou grupo ao ano en relación co Día das Letras Galegas correspondente. 

Montse Rivera e Leilía son as homenaxeadas neste ano das Letras Galegas adicado á tradición oral e as cantareiras, pola súa contribución ao longo de trinta anos, e os que quedan por vir, ao coñecemento, salvagarda e divulgación da tradición oral e as cantigas populares, e por inspirar tanto ás seguintes xeracións de artistas como á cidadanía en xeral a converter a pandeireta e a tradición oral en parte da súa vida e creación artística. 

Das árbores do eido do noso centro, o freixo pareceunos a escolla máis aquelada para a ocasión, pois da súa madeira fanse exclentes pandeiretas, instrumento co que sempre asociaremos no noso imaxinario a Leilía. Moitas grazas Leilía por serdes raíz ceiba e moitos parabéns!

Non deixedes de visitar no espazo exterior da biblioteca unha exposición que fai unha semblanza do grupo Leilía.

Charlas científicas

O bioquímico Yeosvani Cabrera Artiles charlou cos alumnos e alumnas de 1º de bacharelato da materia de Bioloxía, sobre o papel das proteínas como marcadores tumorais.

Yeosvani Cabrera, desenvolveu a súa carreira en Cuba durante 24 anos, traballou no desenvolvemento da vacina contra a Covid-19, e é pai do alumno Diego Cabreras, do noso centro.

O investigador falou de como, ademais das probas visuais como o TAC e o PET, se empregan as proteínas como indicadores de cancro, entre eles o de colon.  

Dámoslle as grazas por achegar a ciencia ao alumnado cunha charla interesantísima e moi accesible.