Visita á reserva da biosfera do Dexo

O día 16 de abril, o alumnado do Club de Ciencia mais o alumnado de Bioloxía de 1º de Bacharelato realizaron un roteiro polo Monumento natural do Dexo, que forma parte da Reserva da Biosfera do Dexo, na Coruña.

A visita foi organizada polo Centro de Extensión Universitaria e Divulgación Ambiental (CEIDA) e realizada por dous membros do centro, Ángel e Jorge.

A rapazada desfrutou da interesante visita e do achegamento ao patrimonio natural e cultural. 

O alumnado achegouse á flora e a fauna do lugar, así como á súa xeoloxía, relevo e meteoroloxía. Puideron experimentar a bravura do mar na formación de furnas nos cantís o, ver a veta de seixo branco que dá nome ao lugar, coñecer plantas costeiras como a margarita da costa, o pirixel de mar ou a famosa herba de namorar, ver os primeiros lagartos arnais que xa empezan a asomarse ao sol,  tobos de coellos e mesmo unha cría de corvo mariño cristado que nacera esa mesma mañá e que se atopaba protexidiño no niño cos seus pais. 

Os elementos de patrimonio cultural que máis chamaron a atención da rapazada foron a Igrexa de Santa María do Dexo, de estilo románico e dotada de abundantes canzorros que o alumnado intentou descifrar, e a batería militar de Seixo Branco, que aínda que nunca foi atacada, servía para defender as costas de posibles ataques durante a Segunda Guerra Mundial.

Ademais, tamén coñeceron o patrimonio inmaterial da zona a través dos nomes locais da flora e a fauna, ou os ditos que dan conta dos perigos do mar na zona, como aquel que di Quen pasou a Marola (illa da zona), pasou a mar toda.

Para rematar a xornada, o grupo gozou dun xantar na praia de Mera. Para o vindeiro curso seguiremos explorando outras zonas interesantísimas de Galicia!