Feliz día das letras galegas 2020!

Chegou un ano máis o 17 de maio, o Día das Letras Galegas! Aínda que por mor da pandemia do COVID-19 a celebración oficial deste evento se vai trasladar ao 31 de outubro, queremos desconfinar a lingua e celebrar de xeito virtual esta data tan importante para todos os galegos e galegas.

Este ano, o Día das Letras Galegas homenaxea a Ricardo Carvalho Calero, un historiador da literatura, crítico literario, filólogo, lingüista e escritor galego nado en Ferrol en 1910 e finado en Santiago de Compostela en 1990.

Carvalho Calero foi membro do Seminario de Estudos Galegos e do Partido Galeguista, o primeiro catedrático de Lingua e Literatura Galega da Universidade de Santiago de Compostela, e membro numerario da Real Academia Galega. 

Tamén foi membro de honra da Associaçom Galega da Língua e é considerado o ideólogo do reintegracionismo lingüístico, que é unha corrente que defende que a lingua galega é unha variedade da lingua portuguesa ou do galego-portugués.

Para este día tan espacial, o Departamento de Lingua e Literatura Galega creou o reto de que a comunidade educativa mandase unha foto evocadora dos versos de Carvalho Calero o azul cravado ao alto con mil cravos de ouro ao cancelo #carvalhonafiestra.

Premendo aquí podedes ver o bonito vídeo montado pola profesora Pepa Gamarra con todas as fotos.

Moitas grazas por homenaxeardes a Carvalho Calero e compartirdes as vistas desde as vosas fiestras! Feliz Día das Letras Galegas!