Día das bibliotecas

O Día das Bibliotecas celébrase o 24 de outubro desde 1997. Trátase dunha conmemoración impulsada pola Asociación de Amigos del Libro Infantil y Juvenil á que se foron sumando, xa dende hai algún tempo, o propio Ministerio de Cultura e todas as administracións autonómicas.

No caso galego, a Dirección Xeral do Libro, o Cómic e a  Lectura, da Subdirección Xeral  de Coordinación Bibliotecaria é o organismo que impulsa esta edición da celebración do Día das Bibliotecas.

O lema deste ano, "Por un futuro sostible", pretende destacar o papel fundamental que desempeñan todas as tipoloxías de bibliotecas (públicas, escolares, universitarias, especializadas e nacionais/rexionais) na consecución dos Obxectivos de Desenvolvemento Sostible da Axenda 2030.

A través das súas coleccións, servizos e actividades con usuarios, as bibliotecas contribúen a construír unha sociedade cada vez mellor informada, máis igualitaria, solidaria e xusta, plenamente consciente da necesidade de levar un modo de vida sostible como compromiso coas xeracións futuras.

 Información tomada de Bibliotecas Escolares.

No noso instituto, celebramos o día recabando información sobre a opinión que ten o alumnado sobre a biblioteca e recollendo suxestións para a súa mellora, xa que estamos nun proceso de transformación da biblioteca no que queremos implicar a toda a comunidade educativa.

O alumnado respondeu ás seguintes preguntas con respecto á biblioteca: Que non che gusta? Que che gusta? Con que soñas? As respostas serán integradas no plan de biblioteca que estamos a crear. Moitas grazas polas vosas respostas!

Tamén aproveitamos para lembrarvos que temos unha solta de libros na mesa situada á entrada da biblioteca. Botádelle unha ollada e levade os que vos gusten. Son para vós!