Traballos de inverno

Os alumnos e alumnas de 1º ESO A  da materia de Xeografía e Historia levaron a cabo o mantemento da arquitectura viva creada polo alumnado o curso pasado ao abeiro do programa Patio con(vida) do Proxecto Terra, Plan Proxecta.

Os alumnos e alumnas identificaron doce pés de vimbios que secaron desde o plantado no curso pasado e substituíronnos por doce novos pés.

Foi valorada a posibilidade de podar os vimbios, mais despois de consultar co xardineiro Moncho López, tomouse a decisión de non facelo para segurar que na primavera e verán poidamos gozar de sombra e fresco dentro da cúpula. Segundo a evolución da forma da estrutura volverase valorar a posibilidade de poda o vindeiro curso.

Os alumnos e alumnas de 2º ESO G da materia de Matemáticas propuxéronse averiguar o motivo polo que secaran os doce pés de vimbio mencionados. Para iso plantaron catro pés de vimbio e están observando a súa evolución ao longo do tempo. Agardamos impacientes as conclusións do estudo!