Biblioteca Carlos Nieto: Día de Rosalía

O 23 de febreiro celébrase o Día de Rosalía de Castro, coincidindo co aniversario do nacemento da autora. Un ano máis, no centro aproveitamos para homenaxear a Rosalía e gozar da súa obra.

O Departamento de Dinamización Lingüística do centro propuxo a actividade Flores para Rosalía.

Esta actividade, na que participaron os alumnos e alumnas de 1º de ESO e 2º de bacharelato, consistiu en crear unha antoloxía poética con fragmentos da obra de Rosalía de Castro que fagan referencia a plantas, acompañando eses fragmentos cun herbario das plantas mencionadas.

O día 23 de febreiro realizouse unha exposición dos poemas e do herbario no espazo Maruxa Mallo e unha lectura colectiva de poemas da autora. O acto estivo presentado pola alumna Paula Vilas, de 1º de bacharelato.

O día 23 de febreiro, tamén se puido degustar un caldo de gloria, na cafetería do instituto, en homenaxe a Rosalía de Castro.

Agradecemos a Diana Pastoriza e á ilustradora Mónica Terteres por ternos preparado unhas fermosas postais personalizadas co tema da nosa actividade a Rosalía deste curso: Flores para Rosalía.

Para Coñecer mellor a obra de Rosalía, podedes achegarvos ver a exposición de bibliografía e filmografía dispoñible no espazo Maruxa Mallo no primeiro andar en fronte da biblioteca. Non dubidedes en reservar calquera das interesantes obras que alí se expoñen.

Ademais da información dispoñible no centro, podedes coñecer máis sobre Rosalía de Castro vendo o filme Contou Rosalía, dirixido por Zaza Ceballos e estreado en 2018, que trata sobre a vida da poeta en Madrid. Premede aquí para ver o tráiler da película.

Para saber máis sobre a celebración do Día de Rosalía podes consultar o sitio web da Casa Museo de Rosalía de Castro premendo aquí. Este sitio web vén de incorporar, unha visita virtual á casa de Rosalía, que podedes ver premendo aquí.

Se o que vos apetece é unha andaina, podedes facer a ruta cultural As pegadas de Rosalía. Esta ruta ten como obxectivo achegar a vida de Rosalía a toda a poboación.

Ao longo desta ruta cultural, baseada no percorrido deseñado polo intelectual Avelino Abuín de Tembra, poden visitarse os lugares emblemáticos da vida e do legado literario de Rosalía de Castro.

Se queres saber máis sobre esta ruta podes ir ao sitio web oficial da ruta e tamén premer aquí, aquí e aquí.

E de lectura de poesía a poesía musicada, propoñémosvos unha escolma de versións musicadas de poemas de Rosalía de Castro na que hai unha gran variedade de estilos: