Premios para o alumnado do IESP de Ames

 Os alumnos e alumnas de 4º ESO A e B durante o curso 2020-2021 participaron no IV Certame de de recollida de imaxes do patrimonio inmaterial galego-portugués, organizado pola asociación Ponte...nas ondas!

Dous alumnos resultaron premiados nese certame na sección de traballos sobre imaxes enviados por alumnado de ensino secundario obrigatorio: Daniel Campos Pauzat conseguiu o primeiro premio, e Icía Fernández Ferreiro foille outorgado un accesit.

Desde a biblioteca do centro dámoslle os parabéns a todos os alumnos e alumnas participantes, e dun xeito moi especial a Dani e Icía. Excelente traballo!

A seguir podedes ver as fotografías premiadas de Dani e Icía co texto explicativo. Podedes acceder a todos os traballos desde o Museo Virtual KaleidoScapes.

Título: Esperanza e liberdade. Fotografía enviada e comentada por Dani Campos Pauzat (1º premio)

O meu bisavó naceu en Noia, era mariñeiro e antes do 36 estaba vivindo en Cádiz. Despois de unirse ao bando republicano e perder a guerra tivo que exiliarse.

Esta fotografía tiña un valor especial para o meu bisavó porque foi tomada nada máis chegar a Francia despois da viaxe a pé polo Pirineo para fuxir do Franquismo e das represalias aos republicanos en España.

Aínda que o recibimento por parte das autoridades francesas non fora o esperado, para os que chegaban era o comezo da liberdade despois de moitos anos de persecución.

A fotografía foi tomada por un amigo co que viaxou dende España e que firmou unha dedicatoria por detrás: " A mi buen amigo Antonio con todo el afecto- Barcarés-1940".

O meu bisavó contaba a miúdo que os dous fixeran unha foto similar e que para facelas compartiran o mesmo abrigo posto que a pesares de ser inverno só tiñan un.

Despois desta foto foi detido polas autoridades francesas e pasou varios meses no campo de refuxiados de Argelés sur mer, a continuación foron levados polos alemáns a Burdeos para traballar na construcción dunha base naval.

Ao terminar a guerra embarcouse de novo para acompañar aos xudeus superviventes a Palestina e a volta decidiu quedarse definitivamente en Burdeos onde coñeceu a miña bisavoa.

35 anos máis tarde volveu a Noia por primeira vez e aínda tiña o medo no corpo.

Título: Xantar en Santa Minia. Fotografía enviada e comentada por Icía Fernández Ferreiro (Accesit)

Esta foto foi tomada na década de 1950 nas festas de Santa Minia, en Brión (A Coruña), un 27 de setembro.

Pódese ver un grupo de mozos e mozas do lugar de Logrosa e Negreira, despois de xantar. Comían nunhas leiras en fronte a carballeira de Santa Minia, pois nela había terra.

Era das últimas festas do verán, xuntábanse os mozos e mozas de Logrosa a primeira hora da mañá e saían andando cara Brión (7km) para chegar a tempo á misa e procesión, que era pola mañá. Na misa, a banda tocaba o himno español ao alzar (no momento da consagración). A xente ofrecía figuras de cera representando partes do corpo para curarse.

A roupa coa que saían da casa era a que usaban durante todo o día, agás os zapatos: levaban unas zapatillas para camiñar e poñían os zapatos ó chegar. As zapatillas había quen cargaba con elas nunha bolsa e quen as escondía no camiño. Non levaban roupa “de festa”, mais tampouco era a de diario.

Para ambientar a festa había unha banda de música grande. Para comer levábase tortilla e filetes empanados, e para beber viño. Se precisaban auga había unha fonte na carballeira.

Emprendían o camiño de volta con tempo para chegar antes do anoitecer.

Actualmente, séguese celebrando a romaría, á cal acoden moitos devotos procedentes de toda Galicia para pedir a intercesión da Santa e ofrecerlle figuras de cera.