Lectura e familias

Este curso,  o IESP de Ames participa por primeira vez no programa Lectura e familias,  no contexto do Plan LÍA de Bibliotecas Escolares (Lectura, Información e Aprendizaxe), para promover a lectura entre os distintos sectores da comunidade educativa, en centros públicos de titularidade da Consellería de Educación, Ciencia, Universidades e Formación Profesional.A temática escollida para esta primeira edición do programa é Benestar emocional e desenvolvemento persoal,  e en relación con esta temática, han ser realizadas diferentes actividades ao longo do curso. 

O xoves, 11 de decembro, ás 17:00, tivo lugar na biblioteca do IESP de Ames a primeira charla do programa, titulada  Como acompañar as adolescencias actuais desde a regulación emocional e a saúde mental no fogar. Esta charla foi impartida polo psicólogo Iván Baliña Rodríguez, do equipo Coidadosamente, e estivo dirixida ás familias e persoas titoras do alumnado do IES Plurilingüe de Ames. Nesta actividade particparon 28 familias.

Animamos a todas as familias a asistir e participar activamente nas diferntes propostas formativas e a facer suxestións de actividades que consideren de utilidade para o benestar emocional do alumnado, as familias e a comunidade educativa.

Dentro do programa Lectura e Familias, puxemos en marcha Lazos de Papel, un proxecto colaborativo entre o Departamento de Orientación, a Biblioteca e a ANPA do centro, co obxectivo de crear lazos e vínculos entre toda a comunidade educativa a través de lecturas de diferentes temáticas e en distintos soportes. Durante este curso as bolsas viaxeiras de Lazos de papel tratarán sobre a temática de Lectura e familias deste ano académico: o benestar emocional e o desenvolvemento persoal.

O 15 de decembro tivo lugar a actividade titulada Benestar emocional e desenvolvemento persoal, organizada pola ANPA e polo instituto. Esta actividade realizouse en dúas fases: a primeira consistiu nunha charla ofrecida tanto ao alumnado (mediante dúas sesións, unha para o alumnado de 4º de ESO a 2º de bacharelato), como as familias (nunha sesión).

As persoas relatoras das charlas foron:

Yolanda Triñanes Pego, xefa do servizo de Saúde Mental da Consellería de Sanidade e coordinadora do proxecto Biblioterapia: Lecturas saudables

Mónica Castro Murga, médica alergóloga no Hospital de Ferrol e experta en Bioética, presentará unha proposta de lectura do xénero narrativo (Frankestein) 

Alberto Ramos Caneda, médico psiquiatra no Hospital de Santiago, introduciranos na literatura específica de cremento persoal ou autoaxuda.

A segunda fase consistiu no reparto entre as familias de bolsas viaxeiras de Lazos de Papel, con propostas de lectura en diferentes xéneros e soportes arredor desa temática. Esperamos que o proxecto sexa do interese da comunidade educativa. Animádevos a participar tamén facendo suxestións de lecturas sobre benestar emocional e novas temáticas do voso interese para as seguintes sesións.

O día 12 de marzo, tivo lugar a segunda sesión do programa Lectura e Familias, desenvolvido polo Departamento de Orientación, a Biblioteca e a ANPA, na que se pretenden afortalar os vínculos entre o instituto e as familias.

Esta segunda sesión consistiu nunha charla da psicóloga Belén Montesa Lou do equipo CoidadosAmente, sobre acoso escolar.  A charla foi seguida por un coloquio sobre o tema e rematou co reparto de bolsas do programa Lazos de papel con lecturas que teñen como temática acoso.

O 9 de abril volvemos cambiar de escenario de reunións do Club de lectura Paroliñas e trasladámonos desde a biblioteca do centro ata a Librería Leria, con Iria como anfitrioa de excepción. Ademais esta xuntanza foi realizada en colaboración co programa Lectura e familias, adicado ao benestar emocional e saúde mental.

Nesta ocasión lemos ensaio, a obra As tolas que non o eran, de Carmen V. Valiña, quen nos fixo un oco na súa ateigada axenda para compartir impresións sobre a obra connosco.

Carmen falounos dos aspectos reais e ficticios do ensaio, dos seus encontros con descendentes de persoas protagonistas da obra como resultado da publicación, e mesmo nos falou da obra, neste caso de ficción, que vén de publicar, a novela Illas de sangue, situada na Illa de San Simón e que volve ter ás mulleres invisibilizadas como protagonistas.

O 28 de maio, tivo lugar a cuarta e derradeira charla deste curso do programa Lectura e Familias, desenvolvido polos equipos de Biblioteca e Orientación e pola ANPA, no marco da convocatoria da Consellería de Educación, Ciencia, Universidades e Formación Profesional.

A charla, titulada O impacto das redes sociais no benestar emocional da mocidade, foi impartida por Miriam Otero Requeijo, psicóloga de Coidadosamente. 

A psicóloga falou do impacto da sobreexposición da mocidade ás redes sociais e o papel fundamental que xogan as familias no seu uso axeitado. 

Dentro do programa Lectura e familias e en colaboración co programa Biblioteca creativa foi creada unha baralla de emocións. 

Esta baralla está formada por 44 tarxetas individuais que representan cadansúa emoción por medio dunha imaxe e a súa definición. A baralla será empregada o vindeiro curso en titorías e na aula de convivencia para facilitar que o alumnado poida falar das súas emocións.