Xa temos a nosa pociña experimental

A creación dunha charca experimental era unha das actividades que nos facía máis ilusión do proxecto Patio con(vida) a convivir ao abeiro do Proxecto Terra e do Proxecto Educación Patrimonial, ambos os dous dentro do Plan Proxecta, e do PFPP do centro O IESP de Ames un espazo sostible e seguro. 

A sucesión de borrascas que non daban acougo case puxeron en perigo a construción da poza experimental; pero finalmente o 23 de febreiro, grazas áo equipo de medioambiente do Concello de Ames, e a ONG medioambiental ADEGA, conseguimos ter a nosa charquiña. 

Moitas grazas a Patricia e a todo o equipo medioambiental do Concello de Ames e a Ramsés de ADEGA.

Esa mesma semana xa comezamos a observar, analizar e documentar os cambios na charca. Os alumnos e alumnas de 3º ESO de Xeografía e Historia comezaron o seguimento dos cambios que se van producindo na charca e no seu contorno. Os alumnos e alumnas de Matemáticas de 1º ESO realizaron a cubicación da charca e están a observar as variacións no nivel da auga. O alumnado de 1º de bacharelato de Técnicas de laboratorio está a realizar análises periódicas da composición química da auga e ten sempre agua en reserva por se for preciso realizar aportes extra de auga por mor da evaporación. Os alumnos e alumnas de 3º ESO da materia de Bioloxía realizarán a observación microscópica dos protozoos presentes na auga. 

Se tes calquera proposta, non dubides en transmitírnola e en unirte ao equipo de observación da poza experimental e o seu contorno.