As plantas do eido do IESP de Ames

A pradeira natural que creamos no curso 2020-2021 como parte do proxecto Patio con(vida), do Proxecto Terra, continúa a evoluir. Aínda que non está tan colorida como o primeiro ano, os cambios que se producen ao longo do tempo son moi interesantes. No primeiro ano abundaron as plantas de flor, o segundo ano predominaron as gramíneas, o terceiro ano tiveron gran presencia o mentastre e o papiro, e neste cuarto ano predomina a silveira, ademais de que se observa claramente como un pequeno brote de salgueiro xa se está a converter nunha matogueira de certo porte. Nas fotos de abaixo podes ver a evolución desde a esquerda e no sentido das agullas do reloxo.

Como xa sabedes, desde o curso 2020-2021, estamos a facer un herbario das plantas que imos documentando na pradeira natural e outras zonas do noso eido.

Ademais do herbario tradicional, este curso estamos a experimentar coa realización dun herbario dixital a través do escaneado directo das plantas. 

Esta actividade está inspirada no libro A tus plantas Alpujarra, de Anabel Sandoval, Julio Donat e Salvadora Moreno, publicado en 2007 pola Asociación de mujeres de Orgiva. Nesta obra documentan as plantas de Alpujarra a través do seu escaneado. 

Pareceunos unha idea preciosa e un xeito moi bo de documentar as plantas e asegurar o almacenamento do herbario a longo prazo sen que as plantas perderan a súa  cor, así que nos puxemos mans á obra. Enviamos o noso sincero agradecemento á profesora Nely, de Educación Plástica por darnos a coñecer este libro e esta idea.

Facer un herbario escaneado non é tan doado como parece. As plantas menos carnosas e máis planas son fáciles de escanear, mais aquelas máis voluminosas e carnosas presentar un reto grande pois crean sombras no escaneado. 

Para evitar as sombras experimentamos cun prensado tradicional anterior ao escaneado, mais enseguida perden a cor. Seguiremos experimentando e irémosvos ofrecendo os resultados das nosas pesquisas.

Polo de agora deixámosvos tres mostras de flores: o pampullo (Coleosthepus myconis), a herba dos pitos (Aquilegia vulgaris) e a linguaria (Serapias lingua). Que vos parecen? Calquera suxestión que teñades, será moi benvida!

E catro de follas de árbores: abeleira (Corylus avellana), sabugueiro (Sambucus nigra), castiñeiro (Castanea sativa) e carballo (Quercus robur).

O alumnado de 3º ESO experimentou, no bloque de enerxías, coa creación de circuitos electrónicos usando como base as plantas e flores escaneadas conseguindo resultados moi vistosos. Aquí podedes ver a iluminación conseguida nun escaneado de silveira (Rubus ulmifolius).

Os alumnos e alumnas do Club de Ciencia tamén repararon nas plantas do eido e realizaron dúas actividades relacionadas con elas: Pigmentos naturais, na que se analizou o proceso para obtención de pigmentos a partir das plantas, e A natureza a través dos sentidos, na que desafiaron á comunidade educativa a identificar diferentes elementos da natureza utilizando só un sentido concreto.