Xa nos estamos achegando ao final do trimestre e a poder desfrutar dunhas merecidas vacacións.
Coma todos os anos por estas datas, chegan as tradicionais recomendacións de lectura elaboradas pola rede de bibliotecas escolares do municipio de Ames.
Esperamos que vos gusten e que desfrutedes deles de vagariño, coa paisaxe invernía de chuvias, xeada e néboas a través da xanela.
Felices vacacións e lecturas de inverno!
Durante este curso vanse desenvolver no no centro un Programa de Formación Permanente do Profesorado (PFPP) e un Seminario intercentros. Trátanse de programas de formación promovidos pola Consellería de Educación, Ciencia, Universidades e Formación Profesional, e o Centro Autonómico de Formación e Innovación (CAFI)
Dentro do PFPP levaranse a cabo tres itinerarios: Biblioteca, Florería e Polos creativos. O seminario intercentros ten como temática o Dereito ao hábitat rural.
A primeira sesión de formación e traballo en grupo desenvolveuse ao abeiro do Seminario intercentros Dereito ao hábitat rural. Tivo lugar o sábado, 15 de novembro e foi impartido por Arquitectura sen fronteiras e nel participarán 15 centros educativos de educación primaria e secundaria.
Durante a xornada, alternáronse explicacións sobre o Dereito ao hábitat rural, da man de Ana, Alberto, Lucía e Rebeca, e actividades de dinamización e posta en común de coñecementos e experiencias por parte do profesorado participante.
A segunda sesión tivo lugar o 29 de novembro e dividiuse nunha primeira parte de formación en aspectos teóricos xunto con realización de dinámicas de grupo, e unha segunda parte na que cada centro educativo realizou unha presentación dos proxectos que estaban levando a cabo co seu alumnado.
A seguir foi o turno do PFPP, en concreto o itinerario de Florería, que tivo lugar o martes, 18 de novembro. A formación foi impartida por Ángela, florista da Florería Adriá, de Brión, e participou un total de 13 profesores e profesoras. Durante a sesión, Ángela aprendeu ao profesorado a técnica para facer centros florais e grilandas.
O día 4 de decembro comezou a andar o Itinerario de Biblioteca para a elaboración do Plan de Lectura Escritura e Acceso á Información (PLEA) do centro. A sesión estivo a cargo de Diego Rúa, asesor PLEA do noso centro e nela participaron 14 profesoras. A sesión dividiuse en dúas partes, a primeira de introdución ao PLEA e a segunda de análise do contexto do IESP de Ames como base para o desenvolvemento do PLEA.
O xoves, 11 de decembro, ás 17:00, tivo lugar na biblioteca do IESP de Ames a charla Como acompañar as adolescencias actuais desde a regulación emocional e a saúde mental no fogar. Esta charla foi impartida polo psicólogo Iván Baliñas, do equipo Coidadosamente, e estivo dirixida ás familias e persoas titoras do alumnado do IES Plurilingüe de Ames.
Esta actividade realizouse ao abeiro do programa Lectura e familias e nela participaron vinte e oito familias.
Animamos a todas as familias a asistir e participar activamente nas diferntes propostas formativas e a facer suxestións de actividades que consideren de utilidade para o benestar emocional do alumnado, as familias e a comunidade educativa.
Ao longo deste curso terá lugar o I Torneo de xadrez na biblioteca, organizado polo grupo de Xadrez, mediado polos profesores Alberto Losada e Gonzalo Berdeal.
A convocatoria foi moi ben acollida polo alumnado e xa comezou o encontro entre parellas. Aínda que comezaron xogando unha parella de cada vez, o elevado número de alumnos e alumnas inscritas fixo que se decidira realizar dúas partidas simultaneamente.
Se queredes vir animar aos vosos xogadores e xogadoras de preferencia, podedes facelo os xoves no segundo recreo, na biblioteca, onde os atoparedes en estado de máxima concentración!
Un ano máis, desde a biblioteca queremos divulgar o Día Internacional para a eliminación da violencia contra a muller e poñer de manifesto o noso compromiso coa igualdade de xénero e o rexeitamento máis absoluto de todas as formas de violencia contra a muller.
O Equipo de Dinamización Lingüística, o Equipo de Orientación, o Equipo da Biblioteca, O Departamento de Educación Plástica, o Departamento de Agrarias e o Departamento de Inglés prepararon unha serie de actividades para seren realizadas polo alumnado durante as horas de titorías. O resultado das actividades será exposto para a comunidade educativa o día 25 de novembro. Podedes ver a proposta de actividade Koräsonsän
Deixámosvos algúns vídeos que tratan o tema da discriminación da muller e a violencia contra ela.
PremendoTVE publica "Mil mujeres asesinadas", un especial interactivo que homenaxea e relata as vidas de mulleres asasinadas pola violencia de xénero. Este proxecto foi homenaxeado co Prix Europa. Podedes ver un teaser do proxecto neste enlace. neste enlace.
Moito se está a reflexionar sobre a educación e a presión social tradicional nos homes que deriva en comportamentos machistas e como esa educación e actitude social se está a cuestionar. Isto recóllese no documental Clonar a un hombre, dirixido por Iván Roiz, e Serás un hombre, de Isabel de Ocampo, gañadora dun premio Goya ao mellor documental.
A seguir podedes ver o documental Clonar a un hombre completo, e un tráiler do documental Serás un hombre.
Tamén podedes ver o vídeo 48 cosas que los hombres escuchan a lo largo de su vida e 48 cosas que las mujeres escuchan a lo largo de su vida.
Que significa facer algo como unha nena? Por que se utiliza esa expresión como algo despectivo ou ridiculizante? Usas ti esa expresión ou ouvíchela usar a alguén algún vez?
Hai anos foi iniciado un blog de micromachismos cotiás por Eldiario.es. Na actualidade o concepto de micromachismo é coñecido por todos e todas. Podedes ver uns vídeos sobre micromachismos e consultar exemplos de micromachismos aquí e aqui.
Tamén podedes consultar e traballar nas vosas aulas diferentes propostas didácticas disponibilizadas por diferentes organismos.
O alumnado de 2º de bacharelato da materia de Xeografía, Historia, Arte e Patrimonio de Galicia participou no programa de educación ambiental Lixo mariño, organizado polo Centro de Extensión Universitaria e Divulgación Ambiental (CEIDA), e impartido por Laura Calvo.
A actividade consistiu unha charla sobre a xeración do lixo mariño, o impacto no ambiente e as propostas de solución existentes na actualidade, e un obradoiro onde o alumnado analizaba o seu propio papel na xeración de lixo mariño e propoñía solucións para diminuír ese impacto.
O alumnado de FP Básica de Agroxardinería e composicións florais e mais o alumnado de 2º de bacharelato das materias de Xeografía, Historia, Arte e Patrimonio de Galicia e de Xeografía participaron no programa de educación ambiental Emerxencia climática, organizado polo Centro de Extensión Universitaria e Divulgación Ambiental (CEIDA), e impartido por Ángel Prieto.
A actividade consistiu unha charla sobre as causas e manifestacións da mudanza climática, que a converten nunha situación de emerxencia climática, e un obradoiro onde o alumnado analizaba a súa propia pegada ecolóxica e propoñía solucións para diminuír esa pegada.
En 2001, a UNESCO declarou o 10 de novembro como Día Mundial da Ciencia para a Paz e o Desenvolvemento, e a partir de aí, novembro pasou a ser considerado o Mes da Ciencia. A partir de 2018 o profesorado de Galicia comezou a celebrar en novembro o Mes da Ciencia en Galego, co obxectivo de amosar o valor da lingua galega como lingua vehicular de todos os aspectos da ciencia.
Este ano foi declarado o Ano internacional das ciencias e tecnoloxías cuánticas e a figura homenaxeada é Albert Einstein. A nivel galego, no XVI Día da ciencia en galego, o científico homenaxeado é Fernando Calvet.
Fernando Calvet foi un químico catalán, catedrático de Química na Universidade de Santiago de Compostela, e primeiro catedrático de Bioquímica na Universidade de Barcelona. O investigador foi represaliado polo franquismo. Tamén podedes coñecer outros científicos e científicas represaliados durante a ditadura franquista.
A película Os fillos do sol, narra a vida de Fernando Calvet.
O alumnado de Física e Química de 4º de ESO preparou diferentes cartaces informativos sobre as investigacións desenvolvidas por Albert Einstein e Fernando Calvet e realizaron charlas de divulgación para o alumnado de 2º de ESO sobre a relevancia destes dous investigadores.
Este ano, desde a Consellería de Cultura, Educación e Ordenación Universitaria impúlsase a celebración do mes de novembro tamén como Mes da ciencia en galego nas bibliotecas. A imaxe da actuación é o científico Ángel Carracedo, profesor de Medicina Legal, Ética Médica e Bioloxía Molecular da Universidade de Santiago de Compostela. Conocido investigador e divulgador científico, cunha longa traxectoria de colaboración coas bibliotecas na difusión dos valores científicos e do acceso ao coñecemento. Podedes ler o manifesto redactado por Ángel Carracedo en relación con esta conmemoración.
A asesoría de bibliotecas escolares pon á disposición de todas as bibliotecas escolares e as comunidades educativas recursos dixitais relacionados coa ciencia en galego, que esperamos que sexan do voso interese.
Hoxe celebramos o Samaín! e, como todos os anos, ofrecémosvos diferentes actividades nas que vos convidamos a participar. Estas actividades foron preparadas con moito agarimo polos diferentes departamentos e proxectos do centro e o alumnado que forma parte deles: Equipo de Dinamización Lingüística, Club de Ciencia, Departamentos de Agroxardinería, Física e Química, Imaxe persoal, Inglés, Lingua e Literatura Galega, Orientación, Xeografía e Historia, e a Biblioteca. Esperamos que vos gusten!!
Concurso de cabazas e lápidas: Moitas grazas e parabéns ás persoas que preparastes cabazas e lápidas!! Convidamos a toda a comunidade educativa a velas na entrada do instituto, expostas xunto con centros florais preparados polo alumnado de FP Básica de Agroxardinería e composicións florais. O martes faremos a entrega de premios!!
